Gay paartjie se troue was ‘satanisties’
2010-06-03 02:49
Blantyre – Bingu wa Mutharika, president van Malawi, het Woensdag daarop aangedring dat Malawi se mense moet ophou praat oor die vrygelate gay paartjie se “satanistiese” troue.
Mutharika het Saterdag aangekondig dat hy Tiwonge Chimbalanga (20) en Steven Monjeza (26) sal vrylaat wat van onsedelikheid en onnatuurlike dade skuldig bevind is nadat hulle ‘n troue in Desember gehad het.
Hy het sy besluit geneem nadat hy met Ban Ki-moon, die sekretaris-generaal van die Verenigde Nasies, vergader het.
Die Malawiese publiek het egter die swaar vonnis ondersteun en was teen die paartjie se vrylating.
“Die storie eindig daar... Ek wil nie meer hoor hoe iemand oor hulle kommentaar lewer nie. Niemand het die gesag om kommentaar op die gays te lewer nie. Julle sal dinge bederf,” het Mutharika aan verslaggewers vertel toe hy terugkeer van die Frankryf-Afrika beraad in Nice.
Volgens hom was die gay paartjie se troue “satanisties omdat hulle ‘n misdaad teen ons kultuur, teen ons geloof en teen ons wette gepleeg het.”
“Ek kyk nou na skenkers... Wat sal hulle oor die kwytskelding te sê hê?” het Mutharika gevra.
Skenkers, wat Malawi met meer as helfte van hul ontwikkelingsbegroting voorsien, het sy administrasie gekritiseer dat hulle minderheidsgroepe se regte onderdruk.
“Is dit moontlik om skenkings aan Malawi te stop as gevolg van twee mense wat mal is?” het hy gevra.
Muthatrika het gesê hy het die twee mans vrygelaat want “dis menslik om ‘n fout te maak, maar dis goddelik om te vergewe.”
Volg Nuus24 op Twitter.
- AFP