Gay-aktivis in Uganda vermoor
2011-01-27 12:56
Kampala – ‘n Ugandese gay-aktivis, wat verlede jaar in ‘n koerantberig met die kop “Hang hulle” verskyn het, is in sy Kampala-woning doodgemaak.
David Kato was een van drie mense wat in Uganda se Rolling Stone-koerant se reeks anti-gay berigte verskyn het.
“Getuies het aan polisie gesê ‘n man het Kato se huis Woensdag binnegegaan en hom twee keer oor die kop geslaan voor hy in ‘n voertuig vertrek het,” het New Yorkse menseregtegroep Human Rights Watch gesê.
Kato is op pad na die hospitaal dood. “Polisie het aan Kato se prokureur gesê hulle het die wegkommotor se registrasienommer,” het Human Rights Watch gesê.
Polisie kon nie bevestig of die moord as gevolg van Kato se aktivisme of sy seksuele voorkeur was nie. Kato het egter gesê hy het doodsdreigemente na die berig se publikasie ontvang.
Uganda se anti-gay beweging het internasionale opskudding in 2009 veroorsaak met voorgestelde wetgewing wat “herhaalde oortredings” van homoseksualiteit met die dood strafbaar sou maak.
Die wetgewing is egter opsygeskuif na internasionale druk.
Rolling Stone het 29 foto’s gepubliseer met die name en adresse van “oortreders.”
Die eerste artikel, waarin Kato verskyn het, het onder die kop “Hang hulle” verskyn.
Die redakteur van die koerant, Giles Muhame, het die moord veroordeel.
“As hy vermoor is, is dit jammer en ons bid vir sy siel,” het Muhame gesê.
“Ons wil hê die regering moet mense wat homoseksualiteit aanmoedig hang. Ons wil nie hê die publiek moet hulle aanval nie. Ons het gesê hulle moet gehang word, nie gestenig of aangeval nie.”
Volg Nuus24 op Twitter.
- Reuters