Gambië ontken sluipmoordpoging op Guinee-president
2011-09-13 13:40
Banjul – Gambië het Maandag betrokkenheid by 'n sluipmoordpoging op Alpha Conde, die president van Guinee, ontken nadat hy Senegal en Gambië van medepligtigheid beskuldig het.
Conde het tydens ‘n onderhoud gesê dat ‘n vuurpylaanval op sy huis, in Dakar beplan is en dat hy oortuig is daarvan dat dié twee regerings daarvan bewus was.
“Gambië wil net sê dat hy geen kennis dra van die sluipmoordpoging op die Guinese president nie,” luidens ‘n verklaring van die departement van buitelandse sake.
Verder sal Gambië “ook nie sulke beskuldigings ligtelik en sonder verdere verduideliking aanvaar nie siende dat dit nie die eerste keer is dat Guinee sulke uitlatings kwytraak nie.”
Volgens die verklaring moet Conde “liefs nie sulke ongegronde beskuldigings maak nie.”
– Volg Nuus24 op Twitter.
- Sapa - AFP