Gaddafi 'was bang hy eindig op soos Saddam'
2011-10-20 18:06
Kaïro – Muammar Gaddafi, wat graag na homself as die “leier van die rewolusie” verwys het sedert hy in 1969 in Libië aan bewind gekom het, is, ironies genoeg, in sy eie land deur ‘n rewolusie ontsetel en doodgemaak.
Die rewolusie wat tot sy val gelei het, het die einde van Gaddafi se 42 jaar aan bewind van die land beteken en Gaddafi gedwing om van aankomende troepe van die land se tussentydse Nasionale Oorgangsraad te vlug.
Daar is Donderdag bevestig dat Gaddafi doodgemaak is toe troepe hom in sy tuisdorp, Sirte, gevang het. Sy lyk is na Misrata geneem, waar ‘n dokter gesê het hy is aan skietwonde dood.
Gaddafi het neergekyk op die “Arabiese Lente” wat deur die Midde-Ooste en Noord-Afrika gespoel het en burgers van Egipte en Tunisië uitgeskel nadat hulle vroeër vanjaar hul langdienende leiers in opstande ontsetel het.
Toe sy eie mense in Februarie teen hom in opstand gekom het, het Gaddafi hulle as “rotte, donkies, dwelmverslaafdes, lafaards, verraaiers” bestempel en hulle met grootskaalse geweld onderdruk.
Die man wat met vrygewigheid militêre en finansiële bystand geleen het aan rebellegroepe oor die wêreld heen – van Noord-Ierland tot die Fillipyne – is deur rebelle in sy eie land, waar hy beloof het om “nooit terug te val of oor te gee nie”, ontsetel.
Hy het sterk uitgevaar teen die rebelle en Navo-aanvalle – wat in Maart deur die Verenigde Nasies goedgekeur is om burgerlikes te beskerm – en volgehou: “Ek het al die Libiese mense wat my ondersteun en hulle is bereid om vir my te sterf.”
Magte lojaal aan die Nasionale Oorgangsraad het egter beheer oor Tripoli gewen en nader beweeg aan Gaddafi se laaste vestings by Sirte en Bani Walid. Die ontsetelde leier en sy seuns is gedwing om te vlug en weg te kruip, terwyl ander familielede van hom uit die land gevlug het.
Die enigste tekens van lewe was sporadiese radio-uitsendings deur die voormalige leier, waartydens hy ‘n beroep op alle Libiërs gedoen het om die rebelle teen te staan. Dié beroep is nie beantwoord nie.
Sy voormalige minister van buitelandse sake, Abdul Rahman Shalqam, wat die Gaddafi-bewind vroeër vanjaar verlaat het, het gesê Gaddafi se luidrugtige optrede was ‘n skerm vir vrese dat hy ontsetel sal word.
“In onlangse jare het die vrees by Gaddafi gespook dat hy soos Saddam Hussein sal opeindig,” het hy gesê, met verwysing na die voormalige Irakse diktator wat in 2006 tereggestel is.
- Vir 'n video van Gaddafi se dood, besoek Al Jazeera se webwerf (waarskuwing: nie vir sensitiewe lesers nie)
- Volg Nuus24 op Twitter
- Sapa-DPA