Gaddafi verkrag glo vroulike lyfwagte
2011-08-29 07:58
Malta – Vyf vroue wat deel was van Muammar Gaddafi se uitsoekeenheid van vroulike lyfwagte beweer hulle is verkrag en misbruik deur die voormalige diktator, berig The Sunday Times of Malta.
Die vroue het aan ’n sielkundige in Benghazi, Seham Sergewa, vertel hulle is seksueel misbruik deur Gaddafi en sy seuns voordat hulle “weggegooi” is sodra dié mense verveeld geraak het met hulle.
Dié bewerings vorm deel van ’n dossier wat deur Sergewa saamgestel word vir die internasionale misdaadhof en moontlike verhoor in Libië van Gaddafi en lede van sy binnekring indien hulle lewend gevange geneem word.
Een van die vroue het aan Sergewa vertel sy is afgepers om by die eenheid – wat glo tot 400 vroue bevat het – aan te sluit, ná die regime ’n storie versin het dat haar broer dwelms na Libië gebring het ná ’n vakansie in Malta.
“Daar is aan haar gesê ‘jy word óf ’n lyfwag óf jou broer sal die res van sy lewe in die tronk deurbring’,” het Sergewa in ’n onderhoud met die koerant gesê.
“Sy is uit die universiteit geskors en is gesê sy moet Gaddafi vra om in te gryp sodat sy kan teruggaan. Sy moes ’n mediese toets, insluitend een vir MIV, ondergaan wat deur ’n Oos-Europese verpleegster gedoen is.”
Uiteindelik is sy geneem om Gaddafi te ontmoet by sy Bab Aziziya-kampong in Tripoli. Sy is na sy private kwartiere geneem waar sy hom in sy pajamas gekry het.
“Sy kon dit nie verstaan nie, want sy het hom as ’n vaderfiguur beskou, leier van die nasie, daardie soort ding. Sy het sy toenadering geweier en hy het haar toe verkrag,” het Sergewa gesê.
’n Patroon van mishandeling het in die stories duidelik geword.
Die vroue sou eers deur die diktator verkrag word en dan aangegee word aan een van sy seuns en uiteindelik aan hoë offisiere om verder misbruik te word voordat hulle laat gaan is, het die sielkundige gesê.
Die vroue het na vore gekom nadat Sergewa begin ondersoek instel het na bewerings van stelselmatige verkragting wat na bewering tydens die konflik deur lojalistiese troepe gepleeg is.
– Volg Nuus24 op Twitter.
– Die Burger
- SAPA