Gaddafi straks in Zim
2011-08-29 09:11
Kaapstad – Gerugte dat die Libiese diktator, Muammar Gaddafi, hom in Zimbabwe bevind, kon nie Sondag deur die Suid-Afrikaanse regering bevestig word nie.
Die Britse Daily Mail het berig dat Gaddafi (69) na Zimbabwe gevlug het aan boord van ’n straler wat deur pres. Robert Mugabe verskaf is.
Ondersteuners van die Movement for Democratic Change (MDC) het glo sy aankoms Woensdag in die vroeë oggendure gewaar. Daar is verder berig dat hy na ’n luukse woning in die hoofstad, Harare, geneem is.
Volgens ’n woordvoerder vir die departement van internasionale betrekkinge, Clayson Monyela, is hy nie bewus daarvan dat die Afrika-unie se veiligheidsraad, wat tot Vrydag in Ethiopië vergader het, die kwessie oor waar Gaddafi hom bevind, bespreek het nie.
Volgens Monyela het dit ook niks met Suid-Afrika uit te waai as Gaddafi hom wel in Zimbabwe bevind nie. “Zimbabwe is ’n soewereine staat.”
Pres. Jacob Zuma het die AU-vergadering Donderdag en Vrydag gelei. Kommer is uitgespreek oor die toename in wapens in Libië en die bedreiging wat dit vir vrede in die streek en in Afrika inhou.
Sapa-DPA het Sondagmiddag berig Libiese rebellemagte staan gereed om Gaddafi se tuisdorp, Sirte, van die ooste en die weste binne te val.
– Volg Nuus24 op Twitter.
– Volksblad