'Gaddafi-soldate word mishandel deur NOR'
2011-10-13 19:53
Tripoli – Soldate en vermeende lojaliste van Muammar Gaddafi, die ontsetelde Libiese leier, word onder die Nasionale Oorgangsraad (NOR) gemartel om bekentenisse te maak, het Amnestie Internasionaal gesê.
Die NOR hou sowat 2 500 gevangenes in Tripoli alleen aan. Die aanhoudings is glo nie wettig nie.
Amnestie Internasionaal het met sowat 300 gevangenes gepraat wat gesê het dat hulle mishandel is.
“Ons verstaan dat die NOR deur baie uitdagings in die gesig gestaar word, maar as hulle nie nou van die verlede af wegbreek nie, gaan hulle ‘n duidelike boodskap uitstuur dat die mishandeling van gevangenes in die nuwe Libië aanvaarbaar sal wees,” het Hassiba Hadj Sahraoui, Amnestie se adjunk-direkteur van die Midde Ooste en Noord-Afrika, gesê.
Mohammed al-Alagi, die waarnemende minister van justisie, het gesê gewapende milisie tree buite beheer van sy departement op en het belowe om ondersoek in te stel.
– Volg Nuus24 op Twitter.
- Reuters