Gaddafi se seun wil tou opgooi
2011-10-29 08:06
Tripoli – Saïf al-Islam Gaddafi (39) het gepleit vir ’n vliegtuig om hom te kom haal sodat hy hom aan die internasionale strafhof (IS) in Den Haag kan oorgee.
Hy en die voormalige hoof van intelligensie, Abdullah al-Senussi, is glo gereed om verhoor te word, het ’n bron van Libië se Nasionale Oorgangsraad (NOR) gesê.
Aanklaers van die strafhof het in ’n verklaring gesê hulle het daarin geslaag om Al-Islam informeel te kontak. Bemiddelingsprosesse is nou onderweg.
Al-Islam, Gaddafi se seun en die regmatige troonopvolger, is ook Vrydag deur die ISH gewaarsku dat hulle hom sal onderskep en in hegtenis neem indien hy sou probeer om per vliegtuig na ’n Afrika-land te vlug.
Sedert die dood van Gaddafi verlede week het Al-Islam op die vlug geslaan.
Daar word vermoed hy en Al-Senussi skuil tussen die Tuareg-nomade in die Sahara-woestyn, iewers tussen Libië en Niger.
Die ISH het nie gesê waar Al-Islam hom bevind nie.
Luidens die verklaring probeer die ISH om hom tot optrede aan te spoor sodat hy en Al-Senussi in hegtenis geneem kan word. Die ISH het nie sy eie polisiemag nie en maak op lande se samewerking staat.
Luis Moreno-Ocampo, ISH-aanklaer, het gesê hulle het deur informele kommunikasiekanale verneem daar is huursoldate wat Al-Islam help om na ’n Afrika-land te ontsnap.
“Ons kyk ook na die moontlikheid om enige vliegtuig in die lug te onderskep om ’n inhegtenisneming te doen.”
Amptenare van die NOR het ook gesê huursoldate, insluitend dié van Suid-Afrika, tree as lyfwagte vir Al-Islam op.
Nuus24 het vroeër berig oor die Suid-Afrikaanse huursoldate wat Al-Islam steeds bewaak.
Vliegtuie is volgens Die Burger se inligting op ’n gereedheidsgrondslag op die Lanseria-lughawe in Randburg, sowel as in Sjarjah in die Verenigde Arabiese Emirate, om Al-Islam en die Suid-Afrikaanse soldate tot hulp te kom.
Amptenare van die NOR het gesê dit mag dalk Al-Islam se veiligste opsie wees om homself eerder oor te gee.
– Die Burger
– Volg Nuus24 op Twitter.
- Reuters