Gaddafi se seun ís dood, sê Libiese TV-kanaal
2011-10-17 20:59
Tripoli – ‘n Televisiekanaal wat lojaal is teenoor Muammar Gaddafi het die dood van dié onttroonde leier se seun bevestig.
Intussen woed gevegte voort in die oorblywende vestings van magte wat lojaal bly teenoor Gaddafi.
Al Rai-televisie, wat in Damaskus gebaseer is, het gesê dat Khamis Gaddafi reeds 28 Augustus tydens gevegte in Tarhouna, 80 km suid van die hoofstad, dood is.
Die televisiekanaal het ook berig dat sy neef, Mohamed Abdullah al-Senousi, in dieselfde skermutseling oorlede is.
Abdullah al-Senousi is die seun van Gaddafi se hoof van intelligensie.
Die tyding van Khamis Gaddafi en Mohamed Abdullah al-Senousi se dood is reeds deur vegters en ander lede van die regerende Nasionale oorgangsraad (NOR) bekendgemaak.
Dit is egter die eerste keer dat hul dood bevestig word.
Volg Nuus24 op Twitter.
- Sapa-DPA