Gaddafi-regime blameer nóg sterftes op Navo
2011-09-19 14:07
Bani Walid/Sirte – Navo is verantwoordelik vir die dood van 354 mense tydens oornagse lugaanvalle in Sirte, het ‘n woordvoerder vir Muammar Gaddafi die naweek gesê.
Moussa Ibrahim het aan Reuters gesê dat Gaddafi steeds in Libië is en dat hy die “weerstand” teen sy vyande lei.
Hy het gesê dat Navo-lugaanvalle in Sirte, Gaddafi se tuisstad, ‘n residensiële gebou en ‘n hotel getref het. Altesaam 354 mense is glo in dié aanval dood.
Kol. Roland Lavoie, ‘n Navo-woordvoerder, het gesê hulle is bewus van die aantygings.
“Dit is nie die eerste keer dat sulke aantygings teen ons gemaak is nie. Die meeste van die tyd is dit ongegrond en onwaar.”
Die dodetal in dié stad kon egter nie bevestig word nie weens swak kommunikasie sedert die val van Tripoli op 23 Augustus.
– Volg Nuus24 op Twitter.
- Reuters