Gaddafi oorweeg om Tripoli te verlaat
2011-06-24 09:01
Washington – Die Libiese leier Muammar Gaddafi ”oorweeg dit ernstig” om die hoofstad Tripoli te verlaat ná ‘n reeks lugaanvalle deur Navo, het die Wall Street Journal Vrydag berig.
Inligting deur Amerikaanse intelligensiedienste dui daarop dat Gaddafi “nie meer veilig voel” in die hoofstad nie, waar hy vir meer as vier dekades aan bewind was, het die Journal ‘n senior Amerikaanse sekuriteitamptenaar aangehaal.
Nietemin het amptenare gesê hulle dink nie Gaddafi sal die land verlaat nie, ‘n sleutelversoek deur die Libiese rebelle wat al vir weke teen sy magte veg.
Gaddafi het glo talle veilige vestings en ander fasiliteite, beide in die hoofstad en buite, waarheen hy kan vlug.
Die nuus kom terwyl die Amerikaanse president Barack Obama kritiek in die kongres ontvang van mede-Demokrate en sy teenstanders, die Republikeine, oor sy weiering om kongressionele magtiging vir die drie maande oue militêre veldtog te verkry.
– Volg Nuus24 op Twitter
- AFP