Gaddafi kan in Libië bly as hy mag prysgee – Juppe
2011-07-20 19:13
Parys – Muammar Gaddafi, die Libiese leier, mag in Libië aanbly as hy instem om sy mag prys te gee, het Alain Juppe, die Franse minister van buitelandse sake, Woensdag gesê.
“Die hipotese wat in die vooruitsig gestel word, is dat Gaddafi in Libië bly, maar op voorwaarde dat hy homself heeltemal van die Libiese politiek verwyder,” het Juppe aan die Franse LCI-televisiekanaal gesê.
Só ‘n ooreenkoms sal dit vir Gaddafi moontlik maak om vervolging deur die internasionale strafhof (ISH) vir misdade teenoor die mensdom vry te spring.
Juppe het gesê die saak van die ISH se lasbrief vir Gaddafi se inhegtenisname “word nie op die oomblik bespreek nie.”
“Daar is prosedures wat gevolg moet word. Eers dan sal ons sien, as deel van onderhandelinge, watter gevolge daar sal wees,” het hy gesê.
– Volg Nuus24 op Twitter.
- Sapa-DPA