Gaddafi het lankal gevlug, meen dokter
2011-08-24 08:55
Pretoria – Rebellemagte het Dinsdagmiddag Bab-Aziziyah, die laaste vesting van die Libiese diktator, kol. Muammar Gaddafi, binnegedring.
Die kanse is volgens ’n Libiese dokter in Suid-Afrika, wat as deel van sy mediese opleiding in die kompleks diens gedoen het, skraal dat Gaddafi steeds daar is.
“Hy hou nie van klein ruimtes nie en ly aan engtevrees. Hy het nooit langer as ’n dag of twee in die kompleks deurgebring nie. Dan het hy maar altyd weer na een van sy tente in die woestyn getrek,” het die dokter Dinsdagaand vertel.
Rebellesoldate het Dinsdag die standbeeld voor een van die kompleks se drie ingange, wat ’n vuis met ’n vegvliegtuig vasgeklem uitbeeld, bestorm.
Gaddafi het die standbeeld opgerig nadat die Amerikaners die kompleks in 1986 gebombardeer en sy aangenome dogter, Hanna, gesterf het.
Die aanval was uit wraak vir ’n Libiese aanval op ’n Berlynse diskoteek waarin twee Amerikaanse soldate dood is. Gaddafi en die res van sy familie het die aanval net-net oorleef.
Volgens die dokter het die kompleks drie ingange, aan die noorde-, suide- en westekant. Laasgenoemde grens aan ’n woud, terwyl die ander twee onderskeidelik aan die lughawe en ’n snelweg grens.
“Niemand is ooit toegelaat om die bunkergedeelte van die gebou binne te gaan nie. Die kompleks is 6km² groot met heelwat huise, ’n skool, ’n kliniek en dosyne soldate wat die plek bewaak.
“Daar is drie betonheinings waardeur ’n mens moet gaan om na aan die kern van die kompleks te kom. Aan die een kant is ’n groot tuin, en dit is waar Gaddafi se tent gewoonlik opgeslaan was.
“Niemand weet presies hoeveel verdiepings die bunker ondergronds strek nie, maar daar is wel ’n ingewikkelde netwerk van tonnels. Een gaan tot in die Rixos-hotel waar sy seun, Saif al-Islam, Dinsdagoggend die joernaliste verras het.
“Verskeie Europese ingenieurs het die bunker op die terrein, wat vroeër ’n militêre basis was, help bou. Die veiligheidstelsels van die bunker is van die mees gesofistikeerdes denkbaar, maar niemand weet presies hoe goed dit verseël is nie.
“Een van sy lyfwagte is onlangs in die pad gesteek. As die rebelle by só iemand inligting kon kry, sou hulle kon uitvind hoe om in die bunker te kom, maar ek glo nie hulle sal hom dáár kry nie.
“Ek dink hy het lankal gevlug. Ek weet daar is ’n uitgang aan die woud se kant. Die enigste manier hoe hulle dié wat binne-in is gaan uitkry, is om die bunker met water te oorstroom,” het die dokter bygevoeg.
– Volg Nuus24 op Twitter.
- Die Burger