Gaddafi 'gesels met Frankryk' oor uittrede
2011-07-11 08:06
Parys – Een van Muammar Gaddafi se seuns het gesê sy pa se administrasie het in gesprek getree met die Franse regering, berig RSG.
Saif al-Islam se verklaring is uitgereik nadat Gerard Longuet, Frankryk se minister van verdediging, in 'n televisie-onderhoud gesê het dat die tyd vir die nasionale oorgangsraad aangebreek het om met die Gadaffi-administrasie om 'n onderhandelingstafel te sit.
Frankryk is op die voorpunt van die Westerse koalisie om Gadaffi te dwing om sy amp neer te lê.
Intussen het Libiese rebelle 'n oliepypleiding se toevoer afgesny omdat dit volgens hulle olie aan die troepe van die Libiese leier, Muammar Gaddafi, verskaf.
Die rebelle het gesê hulle het die kleppe van die pypleiding na die Zuwarah-raffinadery naby Khamassa gesluit.
Dit is die tweede soortgelyke voorval dié maand. Vroeër is 'n pyplyn naby Zenten in die ooste ook gesluit.
Altwee aanlegte verskaf olie aan die hoofstad, Tripoli.
– Volg Nuus24 op Twitter.
– RSG