Gaddafi-familie beskuldig Navo van oorlogsmisdade
2011-10-26 23:02
Parys – Muammar Gaddafi se familie beplan om aanklagte van oorlogsmisdade teen Navo by die internasionale strafhof aanhangig te maak vir die alliansie se beweerde rol in Gaddafi se dood, het die familie se regsverteenwoordiger Woensdag gesê.
Gaddafi is Donderdag gevange geneem en gedood in Sirte onder omstandighede waaroor daar steeds nie duidelikheid gekry is nie. Dit is wel bevestig dat ‘n Navo-vliegtuig geskiet het op die voertuie waarin Gaddafi en van sy beamptes probeer vlug het.
Marcel Ceccaldi, ‘n Franse prokureur wat voorheen vir die Gaddafi-regime gewerk het en nou die familie verteenwoordig, het gesê die aanklagte sal by internasionale strafhof in Den Haag ingedien word omdat die Navo-aanval direk na Gaddafi se dood gelei het.
“Die opsetlike moord van iemand wat deur die Konvensie van Genève beskerm word, word gedefinieer as 'n oorlogmisdaad in Artikel 8 van die strafhof se Verdrag van Rome,” het hy gesê.
Hy kon nog nie sê wanneer die aanklagte ingedien gaan word nie, maar dat die uitvoerende liggaam van Navo en die leiers van die lidlande van die alliansie daardeur geteiken sal word.
“Gaddafi se moord bewys dat die doel van die Navo-sending nie was om burgers te beskerm nie, maar om die regime omver te werp,” het Ceccaldi gesê.
– Volg Nuus24 op Twitter.
- AFP