Gaddafi bly uit AU-praatjies
2011-06-26 23:18
Pretoria – Die Libiese leier Muammar Gaddafi het ingestem om uit onderhandelinge om die vier maande lange konflik in dié land te beëindig, te bly, het Afrika-leiers ná praatjies Sondag in Suid-Afrika gesê.
Die Afrika Unie se paneel vir Libië “verwelkom Kolonel Gaddafi se aanvaarding om nie deel van die onderhandelingsproses te wees nie,” het ‘n verklaring gelui, sonder verdere uitbreiding.
Die AU se vrede- en veiligheidskommissaris, Ramtane Lamamra, het dié verklaring voorgelees, maar geweier om enige vrae te beantwoord.
‘n Suid-Afrikaanse beampte het ná die paneelvergadering gesê die paneel wou graag hê Gaddafi moes ‘n openbare verklaring aflê waarin hy self sou sê hy gaan nie aan die onderhandelinge deelneem nie, maar hy het geweier.
“Dit beteken hy is klaar,” het die beampte, wat ‘n lid was van die Suid-Afrikaanse span wat verlede maand na Tripoli gereis het in ‘n gefaalde poging om vredesonderhandelinge van stapel te stuur, aan AFP gesê. Hy verkies om anoniem te bly.
Die verklaring het die Afrika Unie se beroep op ‘n onmiddellike skietstilstand wat sal kan lei tot demokratiese onderhandelinge herhaal, asook ‘n beroep op die beëindiging van Navo-lugaanvalle op Gaddafi-teikens.
“Die Libiese partye moet die nasionale dialoog vir ‘n omvattende skietstilstand, nasionale versoening, oorgangsoorkeenskomste en die agenda vir demokratiese transformasie van stapel stuur,” het die verklaring gelui.
“Die maatreëls wat ons voorstel, moet hand-aan-hand gaan met ‘n ewe gedetermineerde humanitêre poging.
“In hierdie konteks herhaal ons die beroep wat ons by die buitengewone beraad van die AU op 25 Mei 2011 gemaak het – naamlik dat die Navo-bomaanvalle stopgesit word en dat ‘n humanitêre pouse onderneem word.”
- Volg Nuus24 op Twitter
- Sapa - AFP