Gaddafi: 'Laat Libië brand'
2011-09-01 22:56
Tripoli – Op die 42ste herdenking van die staatsgreep wat hom die onbetwiste leier van Libië gemaak het, het Muammar Gaddafi gesweer om nié oor te gee nie.
Die boodskap is via satelliet deur Arrai Oruba-TV, wat in Sirië gebaseer is en Gaddafi ten volle ondersteun, uitgesaai.
Gaddafi het onder meer gesê dat hy gereed is vir ‘n “lang stryd” en dat hy nie sal ingee nie, “al brand Libië” .
Hy het sy ondersteuners aangemoedig om aan te hou veg teen die rebellemagte, wat die meeste van die land beheer en Gaddafi uit Tripoli gedryf het.
“Selfs al hoor julle nie meer my stem nie, hou aan veg,” het hy in die uitsending gesê.
“Ons sal nie oorgee nie. Ons is nie vroue nie, ons sal aanhou veg. As hulle ‘n lang, uitgerekte stryd wil hê, dan is dit hoe dit sal wees.
“As Libië brand, wie sal kan regeer? So, laat Libië brand,” het hy bygevoeg.
Gaddafi het sy ondersteuners verder aangemoedig deur te sê dat daar onenigheid heers onder Navo, “wie se lugaanvalle die weg gebaan het vir die oorname van Libië” en die rebellemagte.
Waar Gaddafi homself bevind, is steeds ‘n raaisel.
Hy het egter in die uitsending gespog dat sy laaste bastions onneembaar is.
Volg Nuus24 op Twitter.
- Sapa - AFP