Franse ontvoerde vrou dood
2011-10-19 11:15
Parys – Die gestremde Franse vrou wat vroeër die maand deur Somaliese rebelle in Kenia ontvoer is en na Somalië geneem is, is dood, het Franse owerhede gesê.
“Die kontakte wat saam met ons gewerk het om die veilige vrylating van Marie Dedieu te verseker, het ons van haar dood ingelig,” het Bernard Valero, ‘n woordvoerder van die Franse departement van buitelandse sake, in ‘n verklaring gesê.
Hy het gesê dat hulle nog nie die datum of die oorsaak van Dedieu, wat in haar sestigs was, se dood kon bevestig nie.
Volgens Al Jazeera het die departement egter ook gesê dat "die ontvoerders moontlik geweier het om haar medikasie wat ons gestuur het, vir haar te gee."
Die Keniaanse weermag het 'n militêre sending in Somalië teen die al-Shabaab-rebelle wat verantwoordelik vir die ontvoering is, van stapel gestuur.
– Volg Nuus24 op Twitter.
– Al Jazeera
- AFP