Ethiopië 'stabiel' ná premier se dood

2012-08-22 10:15

Addis Abeba – Ethiopië se regering hou vol die land is stabiel ná die afsterwe van premier Meles Zenawi in die ouderdom van 57, het die BBC berig.

Zenawi is laat Maandag na 'n lang siekbed in 'n hospitaal in die Belgiese hoofstad Brussel dood.

Sy oorskot is na die hoofstad Addis Ababa teruggevlieg en 'n tydperk van nasionale rou is afgekondig.

Die staatsmedia het berig dat die adjunkpremier, Hailemariam Desalegn, tot die verkiesing in 2015 sal oorneem.

Zenawi se dood het vrese oor 'n leemte van leierskap laat ontstaan wat dalk tot onstabiliteit in Ethiopië kan lei.

Die Keniaanse premier Raila Odinga is onder diegene wat sy kommer uitgespreek het dat Zenzawi se dood 'n periode van onstabiliteit in Ethiopië kan teweegbring.

Hy het aan die BBC gesê die situasie in Ethiopië was "baie broos" en dat hy onseker is of die land "ten volle voorbereid is vir sy opvolger".

Zenawi se dood is deur die al-Shabab Islamitiese militante groep in Somalië, waar hy al twee keer troepe gestuur het om te veg, gevier.

– Volg Nuus24 op Twitter.