Ethiopië gasheer van AU-beraad

2012-06-12 13:05

Ethiopië – Die volgende beraad van die Afrika-Unie (AU) is na die Ethiopiese hoofstad geskuif nadat Malawi geweier het om dit aan te bied, het die BBC berig.

Die AU het bekendgemaak dat sy volgende vergadering in Addis Abeba sal plaasvind nadat Malawi nie wou hê pres. Omar Hassan al-Bashir van Soedan moet dit bywoon nie omdat hy deur die Internasionale Strafhof (IS) gesoek word.

Die AU se Ferdinand Montcho het die IS daarvan beskuldig dat hy by Afrika-sake inmeng.

Malawi het gesê hy wil nie hê Bashir moet die beraad bywoon nie omdat hy vir volksmoord en oorlogsmisdade in Darfoer gesoek word.

Bashir ontken die klagtes en sê dit is polities gemotiveerd.

"Nadat Malawi as gasheer van die 19de AU-beraad onttrek het... en na gesprekke tussen ledestate, is daar besluit dat die 19de beraad by die hoofkwartiere van die Afrika-Unie in Addis Abeba, Ethiopië op dieselfde datums gaan plaasvind," het die AU in 'n verklaring gesê. 

– Volg Nuus24 op Twitter.