Ekstremiste teiken Moslem-heilige se graf
2012-09-17 18:32
Bamako – Islamitiese ekstremiste het die graf van 'n Moslem-heilige in die noorde van Mali vernietig.
Dié voorval volg slegs twee maande ná 'n rits soortgelyke voorvalle in dieselfde streek wyd veroordeel is.
"Die Islamiete het Saterdag die mausoleum van Cheik El-Kebir, 330 km van Gao, vernietig," het 'n plaaslike politikus aan die nuusagentskap AFP gesê.
"Twaalf van hulle het op die toneel aangekom. Hulle het die mausoleum met hamers en pikke vernietig."
Volgens bronne is die sogenaamde Islamist militant Movement for Oneness and Jihad in West Africa (Mujao) verantwoordelik vir die voorval.
"Die Islamiete het vandag in Gao gespog oor die vernietiging van die mausoleum van Cheikh El-Kebir. Hulle het gesê hulle het die mausoleum Saterdag stukkend geslaan," het 'n dorpsleier, wat nie sy naam bekend wou maak nie, gesê.
"Dit is 'n misdaad," het hy bygevoeg.
Oumar Ould Gaddy, 'n inwoner van Gao wat glo na aan die Mujao-groep is, het die berigte bevestig.
"Cheik El-Kebir se mausoleum noord van Gao is vernietig. Dis waar," het hy gesê. "Die Islamiete het dit bevestig. Daar is 'n ander mausoleum wat hulle ook binnekort sal vernietig."
Islamitiese ekstremiste is die laaste paar maande in beheer van die noordelike streke van Mali.
– Volg Nuus24 op Twitter.
- AFP
