‘Ek sal as martelaar sterf’ – Gaddafi
2011-09-28 09:14
Tripoli – Muamar Gaddafi, die voortvlugtende Libiese leier, het gesê hy veg steeds saam met sy ondersteuners in die land en is gereed om as martelaar te sterf, het RSG berig.
Gaddafi het in 'n boodskap op 'n plaaslike radiostasie ontken dat hy na die naburige Niger of Venezuela gevlug het. Hugo Chavez, die president van Venezuela, is ‘n ywerige ondersteuner van Gaddafi en weier om die tussentydse regering in Libië te erken.
Dit is nie bekend waar Gaddafi hom bevind sedert die rebelle Tripoli, die Libiese hoofstad, in Augustus oorgeneem het nie.
Die dorp Bani Walid is een van twee van Gadaffi se oorblywende vestings. Gevegte tussen die rebelle en Gaddafi se magte duur reeds twee weke lank in dié dorp voort.
Gevegte kom steeds voor in Sirte, hoewel rebelle aanvoer dat hulle beheer oor die strategiese hawe oorgeneem het.
– Volg Nuus24 op Twitter.
– RSG