'Egiptiese weermag agter sterftes' – prokureurs
2012-01-18 21:00
Kaïro – Hosni Mubarak se regsverteenwoordigers het gesê die weermag is verantwoordelik vir betogers se sterftes tydens hul opstand verlede jaar teen die ontsetelde Egiptiese leier.
Die prokureurs het ook Woensdag in die hof daarop aangedring dat Mubarak niks verkeerd gedoen het nie.
Die regsverteenwoordiger Farid al-Deeb het gesê Mubarak, sy minister van binnelandse sake (Habib al-Adly) en ses top-beamptes is nie verantwoordelik vir die bloedvergieting wat op 28 Januarie begin het nie.
Deeb het aangevoer dat Mubarak ‘n aanklokreël in Egipte aangekondig en op 28 Januarie om 16:00 die weermag in beheer van veiligheid gesit het.
Hy het gesê dat die betogers kort ná 16:00 geskiet en gewond is. Hy meen die weermag is verantwoordelik vir die bloedvergieting.
Deeb het die vorige dag ook melding gemaak van sy kliënt se "onskuld".
“Daar is geen manier dat Hosni Mubarak, wat van moord en misbruik van mag beskuldig word, dieselfde is as die Hosni Mubarak wat ek nou gaan beskryf nie,” het Deeb Dinsdag in die hof gesê.
“Hy is ‘n man met skoon hande en ‘n suiwer hart.”
Aanklaers het vroeër geëis dat die ontsetelde leier die doodstraf opgelê word.
Meer as 850 mense het verlede Februarie in 18 dae se betogings teen sy regime gesterf. Sedertdien regeer die weermag oor die land.
Volg Nuus24 op Twitter
- Sapa - AFP