Egiptiese premier kry meer mag
2011-12-07 16:28
Kaïro – Egipte se nuwe premier het Dinsdag gesê die regerende weermag het ekstra mag aan hom toegestaan en dat ‘n minister van finansies ook aangestel is, het staatsmedia berig.
Kamal al-Ganzouri sukkel sedert hy twee weke gelede as die premier aangestel is om ‘n kabinet saam te stel.
Staatstelevisie het Dinsdag bevestig dat Ganzouri vir Mumtaz al-Saeed as die minister van finansies aangestel het. Twee portfolios, insluitend die van die minister van binnelandse sake, moet nog gevul word.
Die nuwe minister van binnelandse sake sal bekendgemaak word wanneer die kabinet Woensdag ingesweer word.
Ganzouri het gesê die weermag sal presidensiële magte aan hom toestaan “behalwe die wat handel oor die regbank en die gewapende magte.” Hy het nie verdere inligting bekendgemaak nie.
– Volg Nuus24 op Twitter.
- Reuters