Egiptiese polisiebeamptes herontplooi
2011-07-19 19:26
Kaïro – Die Egiptiese minister van binnelandse sake het aan 54
polisiebeamptes wat teregstaan op aanklagte van moord, administratiewe
poste binne die ministerie aangebied, eerder as om hul dienste op te skort.
Die polisiebeamptes is op
borgtog vrygelaat nadat hulle aangekla is van die moord op honderde betogers en kan dus tussen hul afsonderlike verhore voortgaan met dié werk.
Ander, onder wie die voormalige minister van binnelandse
sake, Habib al-Adli, is verhoorafwagtend en in die tronk, óf reeds gevonnis.
Betogers het intussen woedend gereageer op die nuus dat die Egiptiese
kabinet vandeesweek geskommel sal word, grootliks sodat die huidige minister
van binnelandse sake, Mansur Essawy, sy werk kan behou.
Betogers dring aan op spoedige verhore vir amptenare van die
vorige regime en polisie wat by die moord op meer as 800 betogers tydens die
18-dag-revolusie, waarin president Hosni Mubarak uit sy pos verwyder is,
betrokke was.
Eerste minister Essam Sharaf het vroeër dié maand honderde regeringsamptenare verantwoordelik vir 'n verskeidenheid misdrywe afgedank.
Sharaf sou na verwagting Maandag sy nuwe kabinet aankondig
in die hoop dat dit betogers wat in sentraal-Kaïro uitgekamp het, sou kalmeer,
maar sy kandidate is onmiddellik deur die publiek verwerp.
– Volg Nuus24 op Twitter.
- Sapa - AFP