Egiptiese aktiviste 'fokus op revolusie'
2011-06-24 12:46
Kaïro – Aktiviste in Egipte beplan ‘n reuse-optog vir 8 Julie om “die revolusie te red” wat Hosni Mubarak sy posisie as president gekos het.
Die idee agter die optog is om druk op politici te plaas om op te hou met debatte oor die tydsberekening van die verkiesings en om eerder op basiese behoeftes te fokus.
Aktiviste het op ‘n Facebook-blad getiteld “The 2nd revolution of anger” gesê dat die fundamentele versoeke van die opstand – om regte en vryheid te beskerm – nie nagekom is nie en oordonder is deur die vraagstuk of verkiesings of ‘n grondwet eerste moet kom.
“Aan al die strydende politieke magte wat debatteer oor wat eerste moet kom, ‘n grondwet of verkiesings: Red eerste julle revolusie, red Egipte eerste. Ons revolusie is besig om inmekaar te stort,” het die aktiviste op hul Facebook-blad, wat reeds meer as 55 000 lede het, gesê.
Die Operraad van die Gewapende Magte, wat oorgeneem het toe Mubarak in Februarie uit sy amp verwyder is, het parlementêre verkiesings vir September geskeduleer.
Nietemin word daar verwag dat die verkiesings in die hande van die Moslem Broederskap in gaan speel, wat gelei het tot ‘n versoek van sekulêre politieke leiers om die verkiesing uit te stel sodat nuwe partye hulself kan organiseer.
Ander het ‘n beroep gedoen dat ‘n nuwe grondwet voor die verkiesing opgestel moet word as gevolg van vrese dat Islamitiese groeperings te veel invloed sal hê in die opstel van die grondwet.
– Volg Nuus24 op Twitter
- Sapa - AFP