Egiptenare ’n verkiesing beloof
2011-11-23 08:05
Kaïro – Die leier van die militêre raad wat Egipte regeer, het aangekondig dat ’n presidentsverkiesing teen einde Junie gehou sal word en dat ’n referendum oor die onmiddellike oordrag van mag moontlik gereël kan word.
Veldmaarskalk Mohamed Hussein Tantawi, wat ná die afsetting van oudpres. Hosni Mubarak regeer, het Dinsdagaand in ’n TV-toespraak gesê hy het die bedanking van die kabinet Dinsdag aanvaar. Dit vind plaas ’n week voor die parlementsverkiesing, wat volgens Tantawi soos beplan sal plaasvind.
Hy het gesê die militêre raad “streef nie na mag nie en is bereid om die verantwoordelikhede onmiddellik oor te dra deur ’n referendum, indien dit die wense van die volk is”.
Hy het gesê die militêre raad het die bedanking van die premier, Essam Sjaraf, se kabinet aanvaar en het “gevra dat hulle met hul werksaamhede voortgaan totdat ’n nuwe regering gevorm word om met die oorgang te help, tesame met die militêre raad”.
Tienduisende betogers het Dinsdag op Tahrir-plein byeengekom ná dae van dodelike skermutselings tussen die polisie en betogers wat demokratiese verandering eis.
Nadat nuus oor Tantawi se toespraak Tahrir-plein bereik het, het die skare anti-Tantawi-slagspreuke gedreunsing.
“Tantawi is maar net ’n knip-en-plak-weergawe van Mubarak,” het Ahmed Mamduh (35), ’n betoger, gesê.
Reuters het vroeër berig minstens 36 mense is in die jongste vlaag geweld dood. Nog 1 250 is beseer, het mediese beamptes gesê.
Die menseregtegroep Amnestie Internasionaal het die militêre raad van wreedheid erger as dié onder Mubarak beskuldig.
– Sapa-AFP
– Volg Nuus24 op Twitter.
- Die Burger