Egipte wil keer dat Elton John sing
2010-05-03 13:07
Kaïro. – Egipte se musiekunie het gister planne van die Britse sanger Elton John om op 18 Mei ’n private vertoning in dié land te kom hou, afgeskiet weens sy “omstrede uitlatings wat godsdiens aanval”.
“Hoe laat ons ’n gay (man) toe wat godsdiens wil verbied, beweer het die profeet Eissa (Jesus) was gay en gevra het dat Midde-Oosterse lande seksuele vryheid aan gays toestaan?” wou Mounir al-Wasimi, hoof van die Egiptiese Musiekunie, by die nuusagentskap dpa weet.
Die 63-jarige popster het in Februarie in ’n onderhoud met die Amerikaanse tydskrif Parade gesê: “Probeer ’n gay vrou in die Midde-Ooste wees: Jy’s so goed soos dood.”
Dit was nadat hy in dieselfde onderhoud gesê het hy glo Jesus was gay.
Al-Wasimi het gesê dat hy met plaaslike veiligheidsamptenare begin onderhandel het om John se konsert te verbied.
Hy het bygevoeg dat sy unie die enigste liggaam is wat “by magte is om optredes deur buitelandse kunstenaars in Egipte goed te keur”.
Hoewel sommige menseregte-aktiviste beweer dat homoseksualiteit in Egipte aan die toeneem is, is dié onderwerp steeds taboe in die land.
– Sapa