Egipte: Verkiesings moontlik uitgestel
2011-06-20 08:18
Kaïro – Druk neem in Egipte toe om die parlementêre verkiesings, wat in September moet plaasvind, uit te stel om partye meer kans te gee om beter voor te berei, berig die nuusagenstskap AP.
Selfs die premier ondersteun nou dié sentiment, wat volgens vele daarop gemik is om te verhoed dat die Moslem-broederbond 'n té sterk rol speel in die formulering van 'n nuwe grondwet.
Essam Sharaf, tussentydse premier, het Sondag in 'n onderhoud op die Egiptiese nuuswebwerf Masrawy.com gesê hy ondersteun die uitstel om die land se "politieke landskap" 'n kans te gee om vorm aan te neem.
Hy het ook gesê hy dink 'n nuwe grondwet behoort nie voor die verkiesings opgestel te word nie.
Die Islamitiese Moslem-broederbond, Egipte se grootste en bes georganiseerde politieke groep, het woedend op Sharaf se kommentaar gereageer, met 'n leier van die groep wat gesê het die premier moet bedank voor hy sy persoonlike standpunte opper.
"Die mense wil die mag aan 'n burgerlike regering oorhandig. Dit is in die land se belang," het Sobhi Saleh, 'n leier van die broederbond, gesê.
"Die Moslem-broederbond is teen die uitstel van die verkiesings en teen die formulering van 'n grondwet voor die verkiesings."
– Volg Nuus24 op Twitter.
- Sapa - AP