Egipte: Regerende party se leierskorps bedank
2011-02-05 19:11
Kaïro - Die uitvoerende komitee van Egipte se regerende Nasionale Demokratiese Party (NDP), wat pres. Hosni Mubarak se seun, Gamal, insluit, het Saterdag bedank, het 'n staatstelevisiestasie berig.
eNews berig dat pres. Hosni Mubarak ook uit sy posisie as die party se leier bedank het, maar benadruk dat die bedanking nie sy posisie as die land se president raak nie.
"Die lede van die uitvoerende komitee het uit hulle poste bedank. Die besluit is geneem om Hossam Badrawi as sekretarisgeneraal van die party aan te stel," het die regime se kanaal aangekondig te midde voortdurende protesoptogte deur teenregeringsaktiviste.
Badrawi, wat volgens berigte 'n goeie verhouding met opposisieleiers het, vervang ook Gamal Mubarak as die hoof van die party se politieke buro, het die stasie gesê.
- Volg Nuus24 op Twitter
- Sapa - AFP