Egipte: Mubarak terug in die hof
2011-12-28 15:49
Kaïro – Die verhoor van die ontsetelde Egiptiese leier Hosni Mubarak het Woensdag weer ná drie maande begin.
Mubarak het, soos vroeër, die verrigtinge vanuit 'n metaalsel in die hof gevolg.
'n Egiptiese televisiestasie het gewys hoe die 83-jarige Mubarak op 'n draagbaar uit 'n helikopter gedra word, waarna hy per ambulans na 'n hof geneem is.
Mubarak word voor die hof gedaag omdat hy na bewering opdrag gegee het vir die moord op sowat 800 betogers wat in Januarie en Februarie teen sy heerskappy betoog het.
Hy kan die doodstraf opgelê word indien hy skuldig bevind word.
Mubarak en sy twee seuns, wat in die tronk is, staan ook tereg op aanklagte van korrupsie.
– Volg Nuus24 op Twitter.
- Sapa - AP