Drie vas oor beplande staatsgreep in Ivoorkus
2012-09-18 14:15
Accra – Drie mans is in Ghana in hegtenis geneem nadat hulle glo ‘n staatsgreep in die Ivoorkus beplan het, het die polisie gesê.
Die mans wou glo wapens koop toe hulle in hegtenis geneem is.
Altesaam 20 mense is verlede maand dood in aanvalle in die Ivoorkus.
Die Ivoorkus se regering blameer ondersteuners van die land se voormalige president, Laurent Gbagbo, wat nou in ballingskap in Ghana woon, vir die geweld in die land.
Stephen Andoh-Kwofie, adjunk-polisiekommisaris, sê die mans is Vrydag in die dorpie Cape Coast deur geheime polisiebeamptes wat hulself as wapenhandelaars voorgedoen het, in hegtenis geneem.
“Ons het hulle in hegtenis geneem nadat hulle AK-47's by ons mans gekoop het,” het Andoh-Kwofie aan Reuters gesê en bygevoeg dat die mans erken het dat hulle wapens bymekaar maak om die regering van die Ivoorkus se president, Alassane Ouattara, omver te werp.
“Dit blyk of hulle spesiaal na Ghana gekom het om wapens te kry vir ‘n beplande staatsgreep teen Quattara se regering.”
Twee van die mans is afkomstig van die Ivoorkus en het in ‘n hotel gewerk nadat hulle as vlugtelinge geregistreer het.
Gabagbo se ondersteuners ontken enige betrokkenheid by verlede maand se aanvalle en het die Ivoorkus se regering daarvan beskuldig dat hy die aanvalle uitgevoer het om die opposisie te onderdruk.
– Volg Nuus24 op Twitter
- Reuters
