Drie dae van rou ná erge sokkergeweld
2012-02-03 08:02
Kaïro – Egipte het Donderdag drie dae van rou begin ná die dood van 74 mense in geweld by ’n sokkerwedstryd Woensdagaand in Port Said. Honderde mense is beseer.
Die geweld was een van die dodelikste voorvalle in die geskiedenis van sokker.
Die Egiptiese premier, Kamal al-Ganzoeri, het gister op ’n noodsitting van die parlement aangekondig dat die direkteur en bestuursraad van die Egiptiese sokkervereniging en die veiligheidshoof in Port Said ná die tragedie afgedank is.
Die goewerneur van Port Said het ook bedank.
Geweld het ná die eindfluitjie in die stadion uitgebreek toe die tuisspan, Al-Masry, die span Al-Ahly, Egipte en Afrika se suksesvolste span, met 3-1 geklop het.
Ondersteuners van Al-Masry het die veld bestorm en Al-Ahly-ondersteuners met klippe, bottels en vuurwerk aangeval.
Die minister van binnelandse sake, Mohammed Ibrahim, het gesê die meeste van die oorledenes is doodgetrap.
Soldate is ontplooi om die situasie onder beheer te bring. Die polisie het gesê 47 mense is in hegtenis geneem.
Die ramp het gebeur te midde van verskeie voorvalle wat verband hou met swak veiligheid sedert die opstand teen oudpres. Hosni Moebarak.
Sokkergeesdriftiges, spelers en politici het hul woede oor die geweld op sosiale netwerke uitgespreek.
“Daar was dooies in die kleedkamers. Ek sal nie weer sokker speel totdat geregtigheid vir dié mense geskied nie,” het Emad Meteab, doelskieter van Al-Ahly, gesê.
Die Moslem-Broederskap, die grootste politieke groepering in Egipte, het ondersteuners van Moebarak die skuld vir die geweld gegee. “Die gebeure in Port Said is beplan en is ’n boodskap van oorblyfsels van die vorige regime,” het Essam al-Erian, ’n LP, in ’n verklaring gesê.
Die president van die Afrika-sokkervereniging, Issa Hayatou, het gesê “Afrika-sokker is in rou”.
’n Minuut se stilte sal die naweek by die kwarteindstryde van die Afrikabeker-toernooi in Gaboen en Ekwatoriaal-Guinee gehou word.
– Reuters en Sapa-AFP
– Volg Nuus24 op Twitter.
- Die Burger
