Dodetal van oliepyplyn-ontploffing styg

2011-09-13 14:51

Nairobi – Die Rooikruis het gesê die dodetal van 'n oliepyplyn-ontploffing in die Keniaanse hoofstad het tot 82 gestyg, berig RSG.

Nóg ses liggame is in 'n riooldeurdrenkte rivier gevind wat deur 'n krotbuurt in Nairobi loop nadat inwoners Dinsdag self die rivier vir nóg liggame deursoek het.

Aanvanklik is berig dat daar meer as 'n 100 mense tydens dié ontploffing dood is, maar intussen is bevestig dat die amptelike dodetal 82 is.

Die Keniaanse maatskappy verantwoordelik vir die pypleiding het gesê die ontploffing is deur te hoë druk in die pypleiding veroorsaak.

Die gas het in die riool en in die rivier beland wat toe aan die brand geraak het.

– Volg Nuus24 op Twitter

– RSG