Dlamini-Zuma moontlik nuwe AU-hoof
2011-09-21 17:26
Kaapstad – State in suider-Afrika wil hê Suid-Afrika se minister van binnelandse sake, Nkosazana Dlamini-Zuma, moet Jean Ping as hoof van die Afrika-unie vervang, het ‘n amptenaar Woensdag gesê.
Die vyftien lidlande van die Suider-Afrikaanse Ontwikkelingsgemeenskap (SAOG) het ooreengekom om Dlamini-Zuma, wat vir ‘n dekade as Suid-Afrika se minister van buitelandse sake gedien het voor haar eks-man, Jacob Zuma, in 2009 tot president verkies is, vir die pos aan te beveel.
“Al die SAOG-state het die standpunt ondersteun dat ons minister van binnelandse sake die volgende voorsitter van die AU moet wees en Suid-Afrika huldig ook hierdie standpunt,” het Marius Fransman, adjunk-minister van internasionale betrekkinge, gesê.
“Daar is baie respek vir ons minister, minister Dlamini-Zuma, vanweë haar rol die afgelope vyftien tot twintig jaar in Suid-Afrika en in die konteks van buitelandse sake,” het hy gesê.
Die AU sal in Januarie stem vir ‘n nuwe voorsitter. Jean Ping van Gabon, wat as dié land se minister van buitelandse sake gedien het en ‘n voormalige voorsitter van die Verenigde Nasies se Algemene Vergadering is, is sedert 2008 die voorsitter van die AU.
Volgens Fransman het die ondersteuning van ‘n kandidaat uit suidelike Afrika niks met ‘n geografiese mededinging om mag te doen nie.
“Dit gaan nie noodwendig oor geo-politieke spel nie,” het Fransman gesê. “Dit gaan oor baie meer – ons sou nie ‘n kandidaat aanbeveel het as dit nie so ‘n sterk kandidaat soos minister Dlamini-Zuma was nie.”
– Volg Nuus24 op Twitter.
- AFP