Denel help die Soedan 'skoon' vee
2010-11-12 09:44
Juba (Soedan). – Waar ’n wil is, sal ’n veilige pad skoon van landmyne wees.
Dié benadering van Mechem, ’n afdeling van Denel in Suid-Afrika, het vandeesweek weer vrugte afgewerp toe die Verenigde Nasies (VN) se landmyn-kantoor nog ’n gedeelte van ’n pad in die Soedan wat hulle gevee het, “skoon” verklaar het.
Die jongste veiligverklaring beteken die maatskappy se spanne het die afgelope vyf jaar altesaam 9054km van die Soedan se paaie ontmyn.
In sommige gevalle was die bestaande paaie so toegegroei dat nuwes eenvoudig oopgeskraap is, sê mnr. Jaap Kotze, projekbestuurder van Mechem in die Soedan.
Dié land gaan in Januarie ’n referendum hou en dan gaan veilige paaie om by stembusse uit te kom ’n voorkeur wees.
Tientalle myne is reeds uitgehaal, maar vandeesweek het dit duidelik geword dat dié wat steeds daar is, nog jare lank ’n bedreiging vir mens en dier gaan inhou.
’n Stuk grond by Juba, die hoofstad van Suid-Soedan, se lughawe is vandeesweek voorberei sodat gras geplant kan word toe kontrakteurs ’n rits skrapnelmyne oopgegrawe het – nadat ’n ander ontmyningsmaatskappy die grond reeds “veilig” verklaar het.
Gelukkig het nie een van hulle ontplof nie.
Volgens Jaco Crots, operasionele bestuurder van Mechem in die Soedan, sal sy spanne binnekort na ’n gebied in die suidooste van die land in die Jonglei-provinsie vertrek.
Dié provinsie was tot onlangs, voordat Mechem begin het om ’n veilige toegangsroete oop te maak, heeltemal ontoeganklik vir die VN wat humanitêre werk daar wil doen.
Volgens Kotze is die landmyne die hartseer-nalatenskap van die jare lange konflik tussen die weermagte van die noorde en die suide, waar die Soedanse bevrydingsleër (SPLA) die stryd om beheer oor die suide gevoer het.
Geen landmynkaarte bestaan van waar die onveilige gebiede is nie. Die afgelope vyf jaar het Mechem sy eie patrone begin volg namate hy bepaal het hoe diegene wat die landmyne en mynvelde gelê het, te werk gegaan het.
Wanneer die referendum op 9 Januarie volgende jaar plaasvind, is dit ’n haas uitgemaakte saak dat die Suid-Soedan vir soewereiniteit gaan stem.
Dit gaan ’n einde bring aan die noord-suid-haat wat oor dekades heen die lewe van honderdduisende mense geëis of hulle geskend gelaat het.
- Volksblad
