'DRK-verkiesing moet nietig verklaar word'

2011-11-30 09:05

Kinshasa – ‘n Mededinger in die presidensiële verkiesing in die Demokratiese Republiek van die Kongo het Dinsdag versoek dat dié verkiesing nietig verklaar moet word en sê dat owerhede skuldig is aan bedrog.

Vital Kamerhe, ‘n voormalige regeringsminister, het gesê daar is vooraf op die stembriewe ten gunste van pres. Joseph Kabila gestem. Hy het ook gesê dat van die kiesers verhoed is om stemlokale te betree tydens Maandag se chaotiese presidensiële- en parlementêre verkiesings.

Drie ander presidentskandidate het Kongolese aangemoedig om nie die uitslae van die verkiesing te aanvaar nie. Wydverspreide tegniese probleme en bedrog maak dat die uitslae nie geloofwaardig kan wees nie.

“Daar kan geen twyfel wees oor die omvang van bedrog nie. Dit is doelbewus beplan deur diegene in magtige posisies met die medepligtigheid van die nasionale verkiesingskommissie,” het Kamerhe in ‘n brief aan Kabila, die verkiesingskommissie, en ander internasionale liggame geskryf.

“Die polisie het getuies by die stemlokale verjaag nog voor die tel van die stemme kon begin,” het hy gesê met verwysing na verslae deur internasionale waarnemers.

“Hierdie verkiesings moet doodeenvoudig nietig verklaar word.”

– Volg Nuus24 op Twitter. 

- Reuters