DRK-rebelle vorm klein regering
2012-09-19 14:10
New York – Rebelle in die Demokratiese Republiek van die Kongo het hul eie klein regering begin, en het selfs hul eie belastingtariewe ingestel, het ‘n VN-amptenaar gesê.
Herve Ladsous, die VN se hoof van vredeshandhawing, het gesê die feit dat die M23-rebellegroep hul eie “administrasie” gestig het beteken dat die VN se Veiligheidsraad se versoek dat die DRK en Rwanda moet vergader, ernstig opgeneem moet word.
Die VN en die DRK se regering het Rwanda daarvan beskuldig dat hulle die rebellegroep ondersteun.
Ladsous het bygevoeg dat daar die afgelope vyf of ses weke minder geweld was, maar dat die situasie vinnig kan verander.
Die VN se veiligheidsmagte gebruik helikopters om die DRK se soldate te help om die M23-groep uit die stad Goma te hou.
Ladsous het ook die feit dat die M23-groep belasting insamel, sterk veroordeel.
Hy het egter bygevoeg dat die soewereiniteit van die DRK gerespekteer moet word en het gevra dat daar hard gewerk moet word aan die verhouding tussen Rwanda en die DRK.
Die DRK het gevra dat die VN se veiligheidsraad sanksies moet instel teen Rwanda se minister van verdediging en twee ander generale omdat hulle die M23-groep ondersteun het.
Peter Wittig, die Duitse VN ambassadeur en die VN se Veiligheidsraad se president, het gesê ‘n hoëvlak vergadering is belê vir volgende week se Algemene Vergadering oor die toestand in Oos-Kongo.
Daar word verwag dat beide die DRK en Rwanda se presidente die vergadering sal bywoon.
– Volg Nuus24 op Twitter
- AFP
