DRK moet seksuele geweld stopsit
2009-07-16 14:00
Brussel, België- Die Demokratiese Republiek van die Kongo (DRK) moet strenger maatreëls teen seksuele geweld in plek stel, het die menseregte-organisasie, Human Rights Watch (HRW) Donderdag gesê.
Volgens die HRW doen dié land steeds nie genoeg om top-amptenare se wilde seksuele oortredings te voorkom nie.
Daar is verlede jaar 7 703 klagtes van seksuele geweld teen die weermag gelê. Meeste van die slagoffers is tienermeisies.
Die HRW meen amptenare misluk in hul pogings om wydverspreide verkragtings in die land te voorkom. “Soldate word aangekla van seksuele geweld, maar senior-amptenare loop nog los rond.”
Die HRW het President Joseph Kabila versoek om spesiale geregshowe wat van internasionale regters en staatsaanklaers gebruik maak, op te stel.
“Die militêre regstelsel is swak en net ‘n paar gevalle van seksuele geweld by soldate met 'n laer rang, is al vervolg", het die HRW gesê.
-Sapa