DRK hou joernalis, SA fotograaf aan
2011-12-13 08:16
Kinshasa – Anneke Verbraeken, ’n Nederlandse verslaggewer, en ’n Suid-Afrikaanse fotograaf is die afgelope naweek in ’n hospitaal in die Demokratiese Republiek van die Kongo (DRK) gearresteer en ’n paar uur aangehou.
Volgens Radio Netherlands Worldwide het Verbraeken en die fotograaf, wie se naam nie bekend gemaak is nie, Saterdag foto’s geneem van lyke van mense wat Vrydag in verkiesingsgeweld dood is.
Die twee is in ’n hospitaal in Kinshasa gearresteer.
Jan Hofdijk, Verbraeken se prokureur, het gesê die situasie was baie gespanne. Hy het gesê ander buitelanders is ook gearresteer. Die twee joernaliste is ’n paar uur later vrygelaat.
Verbraeken werk onder meer vir Radio Netherlands Worldwide en het die afgelope twee maande verslag gedoen oor die verkiesing in die DRK.
Almal weet pres. Joseph Kabila het met stemme geknoei om aan die bewind te bly, het sy op haar blog geskryf.
– Volg Nuus24 op Twitter.
- Beeld