DRK: Regering ontken hoë dodetal
2010-09-07 10:28
Kinshasa – Die Kongolese regering het Maandag ontken dat honderde mense die afgelope naweek in twee bootrampe gesterf het.
Volgens owerhede het slegs 26 mense in die twee afsonderlike ongelukke gesterf.
Lambert Mende, regeringswoordvoerder, het aan AFP gesê dat 24 mense gesterf het toe ‘n vissersboot Saterdag weens swaar weerstoestande in die Equateur-provinsie omgeslaan het. Volgens hom was daar 30 mense aan boord van die boot.
Mende het ook gesê dat ‘n rivierboot aan die brand geslaan en in die rivier in die Kasai Osccidental-provinsie gesink het. Hy kon nie bevestig hoeveel mense in dié voorval gesterf het nie.
"Dit lyk of daar minstens 24 mense aan boord was, omdat hulle gered is, maar sommige het dalk gesterf, het hy gesê.
"Ons het nie die verslag nie, omdat dié boot nie veronderstel is om mense te vervoer nie."
Na bewering het twee lyke later glo op die oewer van die rivier uitgespoel.
Hierdie tipe ongelukke vind gereeld in die Demokratiese Republiek van die Kongo plaas.
Volg Nuus24 op Twitter.
- Sapa - AFP