DRK: President glo agter teregstelling van aktivis
2012-10-17 14:23
Parys – Joseph Kabila, president van die Demokratiese Republiek van die Kongo, het glo persoonlik beveel dat die menseregte-aktivis Floribert Chebeya tereggestel moet word.
Dié bewerings is gemaak deur Paul Mwilambwe, ‘n voortvlugtige polisiebeampte, wat gesê het dat hy 'n ooggetuie was toe Chebeya in Junie 2010 vermoor is.
Mwilambwe, wat glo die teregstelling op ‘n sekuriteitskamera gesien het, was besig met ‘n onderhoud vir ‘n Franse radiostasie, Radio France Internationale.
Mwilambwe beweer dat genl. John Numbi die opdragte vir die teregstelling van pres. Joseph Kabila ontvang het.
Mwilambwe het gevlug kort na Chebeya se dood. Hy is een van vier beamptes wat saam met ‘n kolonel aan die moord skuldig bevind is. Mwilambwe is in absentia tot die dood veroordeel.
Hy beweer hy kon op sekuriteistkameras sien hoe polisiebeamptes Chebeya met ‘n sak versmoor.
Chebeya was ‘n gerespekteerde menseregte-aktivis wat op 2 Junie 2010 dood in sy motor aangetref is.
Die aktivis was glo saam met sy bestuurder op pad na ‘n polisiestasie om met Numbi te vergader.
Numbi ontken dat hy ooit ‘n vergadering met Chebeya gehad het.
Die bestuurder van die motor is nooit gevind nie.
Mwilambe beweer dat die president ook gesê het dat enige familielid, kollega of vriend wat saam met Chebeya is, dieselfde behandeling moet kry.
– Volg Nuus24 op Twitter
- Sapa - AFP
