DRK: Meer as 1 100 vroue daagliks verkrag
2011-05-11 09:03
Washington - Meer as ‘n 1 100 vroue word daagliks in die Demokratiese Republiek van die Kongo (DRK) verkrag.
Dit maak seksuele geweld teen vroue 26 keer meer algemeen as wat vroeër gedink is, het ‘n studie bewys.
Meer as 400 000 vroue en meisies tussen die ouderdomme van 15 tot 49 is verkrag in ‘n 12-maande tydperk tussen 2006 en 2007, volgens die studie wat in die Amerikaanse Joernaal van Openbare Gesondheid gepubliseer is.
Dit is 26 keer meer as die 15 000 vroue wat volgens die Verenigde Nasies se verslae in dieselfde tydperk verkrag is.
“Ons uitslae bewys dat vorige beramings oor verkragting en seksuele geweld ‘n erge onderskatting van die werklike syfer van seksuele geweld in die DRK is,” het Amber Peterman, die hoofskrywer van die studie, gesê.
“Hierdie nuwe, baie hoër syfers stel ook ‘n konserwatiewe skatting van die werklike syfer voor omdat baie vroue nie daaroor wil praat nie.
“Party vroue voel skaam en ander meld dit nie aan nie omdat hulle verkragting as ‘n straf beskou.”
Daar is ook nie van jonger en ouer ouderdomsgroepe of mans tydens die studie gebruik gemaak nie, het sy gesê.
- Volg Nuus24 op Twitter.
- Sapa - AFP