DA wil inligting oor Mugabe vir WikiLeaks gee
2010-12-08 09:46
Kaapstad - Die DA oorweeg dit om getuienis en bewyse van menseregtevergrype deur pres. Robert Mugabe van Zimbabwe en Zanu-PF aan die omstrede WikiLeaks-klikwerf te stuur.
Die party het Dinsdag op ’n nuuskonferensie by die parlement ’n vyfpuntplan bekend gemaak waarvolgens groter druk op die Suid-Afrikaanse en Zimbabwiese regerings uitgeoefen sal word om Mugabe van die politieke toneel te verwyder.
“Daar sal nooit vrye en reg- verdige verkiesings in Zimbabwe wees terwyl pres. Mugabe aan die bewind is nie,” het dr. Wilmot James, DA-LP, gesê.
James meen Mugabe kan wel gedwing word om uit die politiek te tree indien ’n amnestie-ooreenkoms vir hom en sy handlangers beding kan word.
“Indien hy dit nié aanvaar nie, sal die DA alles in sy vermoë doen om toe te sien dat Mugabe voor die internasionale strafhof gebring word,” het James bygevoeg.
Só ’n stap kan egter ingewikkeld wees omdat Zimbabwe nie ’n ondertekenaar is van die Statuut van Rome nie.
Lande wat dié statuut onderteken het, soos Suid-Afrika, het ingestem tot ’n wêreldstrafhof waar plegers van massamoord, oorlogsmisdade en misdade teen die mensdom aangekla kan word.
“Daar is oorgenoeg bewyse om pres. Mugabe voor die strafhof te daag en Suid-Afrika hét die reg om dit te doen, maar dit sal nie sommer gebeur nie,” het James gesê. “Dit beteken nie ’n mens moet dit nie nogtans probeer doen nie.”