Chaos in Kenia ná moord op radikale geestelike
2012-08-28 21:16
Mombasa, Kenia – Een persoon is dood en twee kerke in Mombasa is geplunder ná die dood van 'n radikale geestelike, het beamptes en getuies Maandag gesê.
Shebab-rebelle wat bande met Al-Kaïda het, word beskuldig van die moord op Aboud Rogo Mohammed. Hy is deur 'n onbekende gewapende aanvaller doodgeskiet.
"Een persoon is dood tydens die betogings," het Aggrey Adoli, streekpolisiehoof,. gesê.
Duisende woedende betogers het ná die moord op Mohammed byeengekom en die strate rondom 'n moskee, waar hy dikwels gepreek het, versper. Die betogers het ook voertuie aan die brand gesteek.
"Daar is nou chaos en ons beamptes is besig om die betogers uiteen te jaar om die orde te herstel. Hulle betoog teen die moord op Aboud Rogo, wat deur onbekende mense doodgeskiet is."
Mombasa, Kenia se hoofhawe, is ook 'n gewilde toeriste-bestemming.
– Volg Nuus24 op Twitter
- AFP
