Chaos heers by Mubarak-verhoor
2011-09-06 10:12
Kaïro – Die verhoor van Hosni Mubarak, die voormalige Egiptiese president, moes Maandag verskeie kere weens oproerigheid buite en binne die hof gestaak word, het RSG berig.
Buite het betogers vir én teen Mubarak saamgedrom en hulle ontevredenheid bekend gemaak omdat die verhoor nie meer regstreeks uitgesaai mag word nie.
Oproeriges het klippe gegooi en die polisie moes bontstaan om die vrede te bewaar.
In die hof was daar skermutselings tussen prokureurs vir die verdediging, die staat en families van slagoffers wat tydens die betogings vroeër vanjaar dood is.
Mubarak ly aan hartprobleme en depressie en word in ‘n hospitaal in Kaïro aangehou.
– Volg Nuus24 op Twitter.
– RSG
- Sapa - AFP