Burundi: 18 rebelle doodgeskiet
2011-11-22 13:46
Bujumbura – Burundese veiligheidsmagte het Maandag 18 gewapende mans doodgeskiet tydens ‘n skermutseling in die oostelike provinsie van Cankuzo, het die plaaslike goewerneur gesê.
‘n Groep gewapende mans het ‘n deel van Kigamba-stad aangeval en ‘n aantal huise beroof, het Jean-Berchmans Niragira gesê.
Die polisie en soldate het die mans opgespoor en ‘n skietgeveg het gevolg.
“Daar was ‘n skietgeveg waartydens 18 van die voortvlugtendes doodgeskiet is en drie gewere is gekonfiskeer,” het Niragira gesê. Hy het bygevoeg dat patrollies op soek is na die ander lede van die groep.
Kigamba is sowat 240 km oos van Bujumbura, die hoofstad van Burundi. Die gewapende groep het probeer om na Tanzanië, ‘n buurland van Burundi, te vlug, het Niragira gesê.
Die plaaslike polisiebeamptes het aan AFP gesê dat die groep uit 40 mense bestaan het wat polisie-uniforms gedra het.
Die groep was deel van ‘n nuwe rebellie wat in die Ruvubu Nasionale Park in die ooste van Burundi gebaseer is.
– Volg Nuus24 op Twitter.
- AFP