Burkina Faso bied politieke asiel aan Gaddafi
2011-08-25 18:58
Ouagadougou – Burkina Faso, ‘n voormalige ontvanger van Libiese hulp, het aangebied om politieke asiel aan kol. Muammar Gaddafi te bied, maar het terselfdertyd die Nasionale Oorgangsraad (NOR) as die Libiese regering erken.
Tsjad, wat ook voorheen van Libië hulp ontvang het, het ook die rebelle-raad erken.
Die twee lande is deel van ‘n lys van 40 nasies wat die rebelle erken het. Die rebelle het beheer oor die meerderheid van Libië verkry en is steeds op soek na Gaddafi.
Yipene Djibril Bassolet, Burkina Faso se minister van buitelandse sake, het gesê dat Gaddafi in ballingskap daar mag woon, al is die land een van die ondertekenaars van die verdrag van die internasionale strafhof. Die hof het Gaddafi van misdade teenoor die mensdom aangekla.
“In die naam van vrede dink ek sal ons, saam met ons vennote in die internasionale gemeenskap, doen wat nodig is,” het Bassolet gesê sonder om verdere details bekend te maak.
– Volg Nuus24 op Twitter.
- Reuters