Burkina Faso: Polisie tronk toe weens student se dood

2011-08-24 11:41

Ouagadougou – ‘n Regter van Burkina Faso het drie polisiebeamptes tronkstraf opgelê weens die dood van ‘n student wat maande se betogings en die dood van ten minste ses mense tot gevolg gehad het.

Twee polisiebeamptes is Dinsdag tot 10 jaar tronkstraf gevonnis en ‘n derde beampte het agt jaar gekry as gevolg van Justin Zongo se dood in Februarie terwyl hy in polisie-aanhouding was. Zongo se familie is tevrede met die vonnis.

Opstande het in Februarie in Burkina Faso ontstaan toe studente betoog het oor die beweerde mishandeling van Zongo terwyl hy in aanhouding was. Die regering het beweer dat hy breinvliesontsteking gehad het.

Die onrus het verder versprei en soldate het ‘n muitery begin wat pres. Blaise Compaore se heerskappy van 24 jaar bedreig het. Compaore het probeer om die onrus te stuit deur sy regering te ontbind en die land se veiligheidshoofde af te dank.

– Volg Nuus24 op Twitter.
 

- Sapa - AP