Burgerlike sterftes was wél Navo se skuld
2011-06-20 12:19
Tripoli – Navo het laat Sondag erken dat hy verantwoordelik is vir die dood van burgerlikes ná 'n bomaanval in 'n woonbuurt buite Tripoli.
Libiese amptenare het die afgelope naweek vyf lyke, onder andere drie peuters, aan verslaggewers gewys en beweer die sterftes is die gevolg van 'n Navo-lugaanval.
'n Verklaring deur die alliansie wat in Brussels uitgereik is, lui: "Navo erken burgerlike sterftes in 'n lugaanval op Tripoli".
Die sterftes is glo die gevolg van 'n lugaanval op 'n bergplek vir missiele.
"Dit wil voorkom of een wapen nie die bedoelde teiken getref het nie en dat daar moontlik 'n fout in die wapenstelsel was wat tot die dood van burgerlikes gelei het," het die verklaring gelui.
Die bekentenis dat die sterftes deur 'n Navo-lugaanval veroorsaak is, is 'n verleentheid vir die alliansie, wat die aanvalle juis uivoer op 'n mandaat van die VN om burgerlikes te beskerm.
Intussen het Mussa Ibrahim, 'n woordvoerder van die Libiese regering, die alliansie daarvan beskuldig dat hy "doelbewus burgerlikes teiken," en dat daar geen militêre teikens is naby die woonbuurt wat deur die lugaanval getref is nie.
– Volg Nuus24 op Twitter.
- Sapa - AFP